A herdanza, o desexo de pervivir, a paternidade, o horror, o íntimo e o político entrelázanse nesta novela libre, ousada e profundamente hipnótica.
Un pai e un fillo percorren Arxentina por estrada, desde Bos Aires ata as cataratas do Iguazú, en plena ditadura militar. No camiño, os controis armados e a tensión constante revelan un país atravesado polo medo. O fillo, Gaspar, é aínda un neno, e o seu pai intenta protexelo dun destino que parece inevitable. A nai faleceu en circunstancias ambiguas, nun accidente que quizais non o foi.
Como o seu pai, Gaspar está destinado a converterse en médium dunha sociedade secreta coñecida como a Orde, un grupo que busca a vida eterna a través do contacto coa Escuridade e a práctica de rituais atroces. O prezo que pagan estes médiums é devastador: o desgaste físico e mental é rápido e implacable. A Orde, dominada pola poderosa familia materna de Gaspar, afunda as súas raíces nunha historia escura que se remonta séculos atrás, desde África ata Inglaterra e, finalmente, Arxentina.
A novela desprega un universo inquietante poboado por casas que mutan desde o seu interior, pasadizos que agochan criaturas imposibles, rituais de sacrificio, liturxias sexuais enigmáticas e obxectos convertidos en fetiches. Atravesa tamén o Londres psicodélico dos anos sesenta, onde a nai de Gaspar coñeceu un mozo cantante andrógino chamado David, e adéntrase na violencia política da ditadura, os desaparecidos, a chegada incerta da democracia e os primeiros anos do sida en Bos Aires.
Nesta obra, o terror sobrenatural funde co horrores históricos moi reais. Unha novela perturbadora e deslumbrante que confirma a Mariana Enriquez como unha das voces esenciais da literatura latinoamericana do século XXI.
