C,XOXO é o cuarto álbum de estudo de Camila Cabello, unha obra que reflicte a súa evolución artística e persoal. Neste proxecto, Camila explora novos horizontes sonoros e líricos, ofrecendo aos seus seguidores unha experiencia musical fresca e auténtica.

Camila asina todas as cancións e acompáñase de dúas mentes clave na produción: El Guincho, responsable de parte do son de Rosalia, FKA twigs e Frank Ocean, e Jasper Harris, habitual de figuras como Lil Nas X, Doja Cat ou Jack Harlow. O resultado é un álbum onde a artista se mostra tal como é.

Como ela mesma afirma, C,XOXO posúe unha “inmediatez emocional e unha crudeza”, e non dubida en definilo como o seu “álbum en solitario máis audaz”. Un proxecto que mestura sons latinos con hip-hop, electrónica, e moita liberdade.

Camila Cabello naceu en Cuba e medrou entre Miami e México. Tras conquistar o público internacional con Fifth Harmony, soubo reinventarse como solista, combinando o pop mainstream con influencias latinas e unha sensibilidade única que a levaron a converterse nunha voz propia dentro da música actual.

El Guincho (Pablo Díaz-Reixa), produtor canario afincado en Miami, marcou un antes e un despois no pop contemporáneo grazas á súa capacidade de fusionar xéneros e crear sons vangardistas.

Jasper Harris, desde Los Ángeles, construíu unha carreira meteórica colaborando con grandes nomes do panorama actual. O seu enfoque melódico e a súa versatilidade convertérono nun dos produtores máis cotizados do momento.