Os creadores da páxina web de cultura pop e moda Tom+Lorenzo descifran as referencias que están detrás dos elementos recorrentes do programa máis queer do planeta, desde a biblioteca á pasarela, pasando polos chulazos e as mensaxes escritas con pintalabios no espello. Pero non fai falta ter visto Drag Race (¿a que estás agardando?) para gozar dos momentos e das lexendarias figuras do mundo drag que o inspiran.
Como advirten os seus autores, este é un libro para ler cunha soa man…, coa outra quererás buscar vídeos, cancións ou máis información en Google sobre os formidables personaxes que desfilan polas súas páxinas.
Asistimos aos disturbios de Stonewall da man da mítica Marsha P. Johnson, a raíña que paseaba por Nova York con flores no cabelo, e de Stormé DeLarverie, o drag king que patrullaba Greenwich Village en traxe de chaqueta. Escoitamos a Crystal LaBeija, fundadora e nai da formidable Casa de LaBeija, erguer a voz para reivindicar a beleza negra no certame de Miss Gay America. Colámonos nos salóns de Harlem onde naceu o vogue, a danza que popularizou Madonna, e nos clubs do Londres dos noventa con Leigh Bowery e os seus looks imposibles. Todo iso coa música de fondo de The Rocky Horror Picture Show. É o tipo de historia que non che deron na escola.
Biografía do autor
Tom Fitzgerald e Lorenzo Marquez son parella desde hai un par de décadas. En 2006, deixaron os seus respectivos traballos para verter todo o seu coñecemento de cine, música, moda e publicidade nunha páxina web de vocación queer inicialmente centrada na televisión e bautizada Project RunGay. Quinze anos despois, a web Tom & Lorenzo, onde fan crítica de televisión, cultura popular e moda, atraeu unha audiencia que hoxe se mide en millóns. Tom e Lorenzo colaboran con distintos medios como People, Forbes ou The Huffington Post. En 2014 publicaron o seu primeiro libro Everyone Wants to Be Me or Do Me.
