Na véspera da noite de San Xoán, a tormenta azouta a fachada do Instituto Atlante del Sol, en Playa Blanca, ao sur de Lanzarote. No seu interior ten lugar a festa de despedida previa ao Festival de Talentos de fin de curso, que se celebrará ao día seguinte.

Algo saíu mal: a moza Ico, estrela do festival, aparece morta no interior do ascensor, asfixiada polo fume, nun macabro eco da lenda á que honra o seu nome.

Profesores e estudantes presentes quedan marcados á vez como testemuñas e sospeitosos do que parece un crime terrible. Con todo, o caso pechase semanas despois por falta de probas concluintes. Accidente, ditan as autoridades.

Agora Naima, aspirante a xornalista e compañeira de Ico, convencida de que as pezas non encaixan, decide retomar a investigación e volver entrevistar a todos os asistentes á festa ata dar coa resposta á pregunta que segue flotando no aire: ¿Quen asasinou a Ico?