O neno que non fun é esa persoa que todo o mundo esperaba que fose, que podería ter vivido a súa infancia de forma tranquila, sendo aceptado e respectado polo resto.
Hai unha experiencia bastante común entre as persoas que pertencemos ao colectivo LGTB e é que moitas de nós vivimos as nosas infancias e adolescencias á sombra dos nenos e nenas que non fomos.
O neno que non fun é esa persoa que todo o mundo esperaba que fose. É o neno normativo, axustado ás expectativas dun mundo que xa tiña pensado como debía ser polo mero feito de nacer cun determinado corpo nunha determinada sociedade. É o neno que podería ter vivido a súa infancia de forma tranquila, aceptado e respectado polos demais rapaces, o que non preocuparía á súa familia, o que podería terse desenvolvido ao mesmo ritmo que o resto.
Este libro é unha viaxe. Unha historia sobre relacións familiares e sociais nunha vida queer. De supervivencia contra a LGTBfobia. E é un intento de responder algunhas preguntas:
¿Como nos afectou aos adultos LGTB que somos non ter sido os nenos que se esperaba que fósemos?
¿Que me gustaría saber cando era un adolescente que comezaba a descubrir a súa orientación sexual e a súa forma de expresarse?
¿Que poderiamos facer saber a nenos, pais e a toda a sociedade para cambiar, pouco a pouco, a vida de miles de persoas LGTB?
