Despois do éxito de Un corazón demasiado grande, regresa Eider Rodríguez cun novo libro de relatos.

«Un xeito de entender a literatura fóra da norma».
Pol Guasch

Unha parella de longa traxectoria enfrontase á verdade no medio dun verán caloroso; dúas amigas que parecen unha soa persoa, pero para quen o mar non significa o mesmo; un xantar de entrañas onde se decidirá quen fai mellor as cousas; unha muller que escava coas súas propias mans en busca de máis espazo; unha turista co nocello roto que xa non pode camiñar coa súa familia; a última mañá dunha parella que aínda se ama.

Os personaxes destes seis relatos habitan un territorio incerto entre o amor e o desamor, a vida e a morte, a plenitude e un benestar apenas suficiente, a fragilidade e o destino. Ao seu redor aparecen cavidades, covas e abismos, ás veces imaxinarios e outras moi reais: fendas profundas na terra ou na carne. A través deses ocos, Eider Rodríguez asómase con precisión e lucidez ao que discorre baixo a superficie desgastada dos afectos, desde as pequenas asimetrías que esnaquizan as relacións ata a perda da felicidade, iluminando coa súa prosa sobria e afiada as emocións incómodas coas que convivimos cada día.