Ambientada ao longo dun verán abafante, unha ópera prima sorprendentemente segura sobre as formas de amor que nos rompen e nos recompón.
Jean, un rapaz xudeu de dezaseis anos cunha vida complicada, atrapado no torbellino contracultural do Londres dos anos setenta, chega a Compton Manor, un internado rural alternativo para rapaces con “problemas”. Disléxico, antisocial e propenso a estoupidos violentos, a Jean nunca lle resultou doado facer amigos e a escola nunca foi un lugar de refuxio nin de goce.
Compton Manor é a súa última oportunidade, pero mesmo alí, a pesar dos métodos de ensino pouco convencionais, Jean segue marcado pola diferenza. Os outros rapaces pagan matrícula; Jean estuda cunha bolsa. Eles proceden de boas familias inglesas; a nai de Jean, Rosa, é unha refuxiada xudea alemá e o seu pai é apenas un recordo ausente. Tras romper as normas en varias ocasións, Jean camiña sobre xeo fino. Só queda superar ese verán: despois aprobará os exames e marchará.
De súpeto entabla amizade con Tom, seguro de si mesmo e encantador, sostido por anos de boa educación e privilexio, e parece que o mundo de Jean podería cambiar. Cando a relación se volve romántica, Jean cae nun namoramento intenso e desbordante. Empeza a saltarse as clases para adentrarse no bosque ou a cruzar campos iluminados pola lúa para ver a Tom, preguntándose se esa relación podería ofrecerlle unha saída a unha vida marcada pola alienación. Pero e se o único camiño verdadeiro cara á liberdade fose desaparecer por completo?
Hipnótica e evocadora, Jean é unha narración meditativa sobre a perda e a fuxida, destilada na historia desgarradora dun amor adolescente tan intenso como perigoso.
