O cine é un poderoso medio de expresión que non só reflicte a sociedade na que se inscribe, senón que tamén moldeia os seus imaxinarios e narrativas. A ollada queer no cine, de Leandro Palencia, é unha obra imprescindible para quen busca comprender como a sétima arte construíu e representou a diversidade en termos de xénero, sexualidade, raza, clase e diversidade funcional.
Este libro, que se achega ao formato dun manual pero sen perder a súa profundidade analítica, ofrece unha panorámica crítica e accesible sobre as formas en que o cine reforza, ou en ocasións desafía, as estruturas dominantes do capitalismo patriarcal branco.
Para explorar estas cuestións, o autor guía o lector a través da análise de cincuenta películas fundamentais, ao tempo que menciona máis de dúascentas producións de distintas nacionalidades e épocas. Lonxe de centrarse unicamente no cine LGTBIQ+ convencional ou en representacións anecdóticas, A ollada queer no cine adéntrase en aspectos clave como violencia de xénero, heteropatriarcado, sororidade, heteronormatividade ou lazos homosociais entre outros.
Como complemento ao seu profundo análise, a obra inclúe un glosario de aproximadamente cen termos clave, facilitando a comprensión dos conceptos máis relevantes nos estudos de cine e teoría queer.
