Novembro de 2020. En pleno estado de alarma, Jon —estudante de 23 anos— e César —transportista de pouco máis de corenta— cruzan España de Navarra a Sevilla nun camión destartalado, saltándose restricións sanitarias. Apenas se viran un par de veces tras coñecerse en Grindr e emprenden unha procura quixotesca: atopar a última sauna aberta, supostamente agochada nun local clandestino de Sevilla.
Para amenizar a viaxe, César pídele a Jon que lea o comezo da novela que está a escribir. Jon acepta a regañadentes, coa esperanza de desvelar algo de verdade sobre a identidade do seu acompañante. A medida que avanzan cara ao sur, o relato de Jon entrelázase con outras historias que, seguindo a tradición do Decamerón de Boccaccio, van compondo a traxectoria vital do narrador.
Memoria, conversas cun antigo amante, morriña, arrepentimento, culpa e esperanza suceden nun mosaico íntimo que explora os vínculos e os límites do desexo en tempos de excepción.
Tras o éxito de Lodo, a súa primeira novela, A última sauna do mundo confirma a capacidade de Julen Azcona para asumir riscos narrativos e sorprender co desenvolvemento das súas historias.
