Un libro colectivo que rende tributo á figura e á obra de John Waters, o cineasta de culto por excelencia.
Co paso dos anos, John Waters converteuse nunha das figuras de referencia non só do cine underground estadounidense, senón da cultura pop en xeral. Na súa longa traxectoria, que abarca desde clásicos da inmundicia como Multiple Maniacs, Pink Flamingos ou Cosa de hembras ata títulos máis mainstream como Hairspray ou Los asesinatos de mamá, o cineasta de Baltimore foi repetindo unha serie de obsesións temáticas e formais que merecían ser estudadas nun só libro.
¡Vida longa ao trash! O cine de John Waters como nunca che o contaran é unha homenaxe a un director que, acompañado por unha troupe de actrices e actores incondicionais –os denominados dreamlanders– como Mink Stole, Patricia Hearst, Susan Lowe e, sobre todo, a mítica Divine, forzou os límites do que estaba permitido ver na gran pantalla con grandes doses de humor, irreverencia e transgresión.
Este libro conta coa participación de Valeria Vegas, Álex Ander, Álex Mendíbil, Javier Parra, La Caneli, Esty Quesada, Sandra Astor, Adrián Silvestre, Xavi Sánchez Pons e Carlos Barea, quen achegan a súa visión e análise sobre o universo cinematográfico e cultural de Waters.
