Patrycja e Lukrecja son dúas travestis que medraron nun Estado comunista. Pasaron os anos 70 e 80 na marxinación e atoparon o glamour na miseria, pavoneándose en parques e servizos públicos, seducindo soldados soviéticos, vivindo a costa dos borrachos e vendo aos seus amigos morrer de sida.
Para calquera que non estivo alí, as súas descaradas e maliciosas historias daqueles anos parecen escandalosas. Agora están a piques de ir a Lubiewo, unha cidade costeira e turística do Báltico habitada por unha xeración máis nova de gays emancipada, e decátanse de que ser gay na Polonia actual, reaccionaria e benpensante, xa non é tan interesante como o era baixo os comunistas. Os veteranos e os mozos manteñen unha loita feroz. Os primeiros reivindican as súas costumes disolutas e gardan certa nostalxia da Polonia comunista. Os segundos, máis civilizados, piden igualdade, respecto, dereito ao matrimonio e á adopción... Todos comparten o pracer pola disputa e a extravagancia. Como no Decamerón, en Lovetown mestúranse retratos, anécdotas, escenas sexuais e recordos de libertinaxe e lévannos a un mundo agochado. Herdeiro de Pasolini, pero tamén do Selby de Última saída para Brooklyn, Witkowski leva a cabo unha proeza literaria. Cambiando constantemente de perspectiva, pasa da traxedia á comedia, do idilio á sátira, do sórdido ao sublime, cunha liberdade que se burla de todos os tabús.
