Igual que me aconteceu a min, hai moitos nenos e nenas que queren iniciar a súa transición, que teñen claro quen son e cal é a súa identidade de xénero, pero non saben como comezar co proceso ou sequera como compartilo coa súa familia. É un camiño difícil e, ás veces, interpóñense moitos obstáculos, pero sempre paga a pena. Dou fe diso. Para comezar, suxíroche que graves na túa memoria que a este mundo non viñemos a sufrir, que tes dereito a vivir a túa identidade de forma libre e a expresarte como queiras.

Neste libro vou falarche da miña transición, a miña infancia, o apoio da miña familia, as trabas burocráticas e médicas ás que tiven que enfrontarme, os prexuízos e as burlas da xente, a transfobia, os meus propios medos… Vou tentar compartir a miña experiencia o mellor posible por se pode resultarte de axuda, a ti, ou ás persoas do teu arredor. Para normalizar algo polo que aínda hoxe estamos loitando e acadar un futuro mellor.

Sobre a autora:

Selena Milán (Gran Canaria, 2000) é youtuber, influencer e escritora, recoñecida como unha das primeiras mulleres en visibilizar a transexualidade a través das redes sociais en España. En 2021 presentou o seu libro Transparencia. Soy Selena Milán y soy una chica trans, onde relata a súa propia experiencia e o camiño de empoderamento que percorreu desde a infancia ata hoxe. A través da súa obra e do seu activismo en liña sinalou as desigualdades, a vulneración de dereitos, a discriminación e a estigmatización que sofre a diario o colectivo trans, ao mesmo tempo que se converteu nun referente de superación, valentía, liberdade e loita para moitas persoas.