A historia de Coco Chanel está marcada pola creatividade, o estilo, o glamour, a forza, o entusiasmo e a determinación. Desde a súa infancia nun orfanato da Francia rural ata a súa morte na habitación do Ritz que lle facía as veces de casa, este libro repasa a súa traxectoria persoal e profesional, primeiro como actriz, despois como sombreireira e finalmente como unha das deseñadoras de moda máis influentes de todos os tempos.

Fundadora do imperio de House of Chanel, Coco revolucionou os armarios das mulleres, ás que deu a oportunidade de vestirse dunha maneira cómoda sen por iso perder un ápice de elegancia. As súas creacións, como o little black dress, as bailarinas bicolor ou o bolso acolchado, seguen a levarse hoxe en día, convertidas nun símbolo da sofisticación cotiá.

Megan Hess, destacada ilustradora de moda, preséntanos nestas páxinas as múltiples facetas do universo Chanel: a muller, a marca e a lenda.